Një sulm me armë ka ndodhur në orët e para të mëngjesit në Leposaviç, ku persona të maskuar dhe të armatosur kanë qëlluar drejt policisë së Kosovës. Si pasojë e të shtënave ka ndërruar jetë rreshteri Afrim Bunjaku dhe është plagosur një polic kufiri i cili ndodhet jashtë rrezikut për jetën.
Kryeministri Albin Kurti dhe Presidentja Vjosa Osmani e kane cilësuar një akt terrorist vrasjen e policit nga krimi i organizuar.
Kreu i qeverise dha detaje nga sulmi duke nënvizuar se sulmuesit janë profesionistë me maska e të armatosur edhe me armë të rënda. Sipas Kurtit të armatosurit kanë bllokuar me kamionë rrugën Mitrovicë-Leposaviç dhe më pas kanë nisur të qëllojnë drejt policisë. Ai paralajmëroi se kriminelët ekzekutorë dhe urdhërdhënësit e tyre do të dështojnë, do të kapen, gjykohen e dënohen.