Dhjetëra persona janë arrestuar në një seri bastisjesh të koordinuara në të gjithë Evropën që synojnë organizatën kriminale “Ndrangheta”, raportojnë mediat gjermane të mërkurën, raporton Anadolia.
Qindra oficerë policie morën pjesë në një operacion të madh në gjashtë vende të Bashkimit Evropian (BE), përfshirë Gjermaninë, Italinë, Francën dhe Belgjikën, njoftoi transmetuesi publik ARD, duke cituar burime sigurie.
Sipas burimeve të operacionit të koduar “Eureka”, është aksioni më i madh ndërkombëtar i policisë deri më tani i drejtuar ndaj grupit mafioz Ndrangheta me bazë në jug të Italisë.
Deri më tani, policia ka arrestuar rreth 100 anëtarë të mafies dhe mbështetës të saj, të cilët merreshin me trafik droge, tregti të paligjshme armësh dhe pastrim parash.
Grupi mafioz Ndrangheta besohet se ka kontrabanduar sasi të mëdha kokaine nga Amerika e Jugut në Evropë, kryesisht duke përdorur portet e mëdha komerciale të kontejnerëve në Belgjikë dhe Holandë.
Sipas hetuesve, rrjeti i pastrimit të parave të grupit operonte kryesisht nga Gjermania, Belgjika dhe Portugalia dhe investonte në restorante dhe pasuri të paluajtshme në disa vende.
