Albin Kurti po merr pjesë në Samitin e Investimeve në Ballkanin Perëndimor në Londër. Ai u shpreh se Kosova është dedikuar në respektimin e ligjit, vendosjen e rendit dhe luftimin e korrupsionit.
Gjithashtu deklaroi se Kosova ka partnerët e saj më të mëdhenj Shtetet e Bashkuara të Amerikës, Bashkimin Europian dhe Britaninë e Madhe.
“Ne jemi të dedikuar për të pasur rend, ligj dhe t’i shpallim luftë korrupsionit. Ne ndajmë të njëjtat vlera me SHBA-të, Britaninë e Madhe dhe BE-në dhe jemi pranë tyre, sidomos pas luftës në Ukrainë”, u shpreh Kurti.
“Ne nuk kemi lidhje me federatën ruse, ne i kemi vendosur sanksione Rusisë. Ne duam që Ukraina të fitojë luftën dhe ne kemi nevojë që Evropa demokratike dhe bota të shohin disfatën e Kremlinit dhe Putinit. Kështu që ne nuk kemi bashkëpunim me ta, edhe pse ata do të donin, por ne nuk duam”, tha Kurti.
Kurti pati dhe një përplasje me kryeministren e Serbisë, Ana Brnabiç, pasi ajo përmendi termin “Kosova e Metohija”. “Ne jemi Republika e Kosovës dhe jo Kosova e Metohija. Jemi shtet i pavarur dhe njihemi anembanë botës”, u shpreh Kurti.
Brnabiç nga ana e saj lavdëroi zhvillimin ekonomik të Serbisë. Ndërsa, Kurti tha se Kosova ka përparuar sa i përket zhvillimit ekonomik. Ai shtoi se Prishtina ka shërbyer për stabilitet rajonal e institucional. Po ashtu, Kurti deklaroi se Republika e Kosovës ka ditur mjaft mirë t’iu bëjë ballë rreziqeve të sigurisë.