Kryeministri i Kosovës, Albin Kurti ka zhvilluar një takim me deputeten britanike Alicia Kearns të dielën. Kurti ripërsëriti thirrjen se Serbia duhet të ndëshkohet për sulmin e 24 shtatorit në veri të Kosovës.
Në një njoftim për media, qeveria tha se në takim mes Kurtit dhe Kearnsit u theksua që prioritet kryesor për Republikën e Kosovës është siguria e shtetit dhe e qytetarëve.
“Pas sulmit terrorist dhe kriminal të 24 shtatorit të kryer nga grupe paramilitare me sponsorim dhe pjesëmarrje të Serbisë, ndëshkimi është vendimtar për mospërsëritje”, tha Kurti.
Rreth dy muaj para sulmit ndaj Policisë së Kosovës ku mbeti i vrarë Afrim Bunjaku, Kearns deklaroi se “armët po kontrabandohen në autoambulanca dhe më pas po ruhen në objektet e kishave”.