Tre efektivët e Komisariatit nr. 3, të cilët i pezulluan për tre ditë për shkak të hetimeve në lidhje me vdekjen e mistershme të 32-vjeçarit Lear Kurti, do të vijojnë të jenë në pezullim për një afat të pacaktuar, deri në përfundim të hetimeve.
Mësohet se pezullimi është shtyrë për shkak të rrethanave dhe dëshmive të reja të administruara nga miqtë e 32-vjeçarit që e shoqëronin atë pak para ngjarjes.
Kujtojmë se ditën e sotme, Prokuroria e Tiranës nisi hetimet në lidhje me vrasjen e mistershme të 32-vjeçarit. Akuza e re e ngritur nga Prokuroria është ajo e ‘kryerjes së veprimeve arbitare” dhe “mosdhënie të ndihmës”. Gjithashtu Prokuroria ka administruar pamjet filmike të Spitalit të Traumës dhe do të marrë në pyetje mjekët dhe infermierët që kanë pritur në spital Lear Kurtin dhe janë kujdesur për të.