Udhëheqësit e NATO-s thanë se shtetet e Ballkanit Perëndimor kanë rëndësi strategjike për aleancën dhe konfirmuan përkushtimin e tyre për sigurinë dhe stabilitetin e rajonit.
“Ne do të vazhdojmë ta përmirësojmë dialogun tonë politik dhe bashkëpunimin praktik, me qëllim të mbështetjes së reformave, paqes dhe sigurisë rajonale, dhe kundërndikimeve keqdashëse, përfshirë dezinformimin, kërcënimet hibride dhe kibernetike, që paraqesin aktorë shtetërorë dhe joshtetërorë”, – u shprehën liderët.
Ata shtuan gjithashtu se Ballkani Perëndimor kërkon vëmendje e përkushtim të vazhdueshëm nga NATO dhe komuniteti ndërkombëtar për t’u përballur me këto sfida.
“Vlerat demokratike, shteti i së drejtës, reformat e brendshme dhe marrëdhëniet e fqinjësisë së mirë janë të një rëndësie jetike për bashkëpunimin rajonal dhe integrimin euroatlantik. Ne presim përparim të vazhdueshëm në këtë drejtim”, – thuhet ndër të tjera në deklaratën e tyre.
Udhëheqësit e NATO-s i bënë thirrje Serbisë, e cila ka status neutral sa u përket aleancave ushtarake, të angazhohet në mënyrë konstruktive me alenacën ushtarake dhe fqinjët e saj.
Për Kosovën dhe Bosnjë Hercegovinën
Udhëheqësit e NATO-s thanë se mbështesin dialogun për normalizimin e marrëdhënieve ndërmjet Kosovës dhe Serbisë dhe i ftuan palët të shfrytëzojnë momentin për t’u angazhuar në mirëbesim, me qëllim arritjen e një zgjidhjeje të qëndrueshme politike.