E drejta e lirisë së shprehjes përfshin lirinë e mendimit dhe lirinë për të marrë ose për të dhënë informacione.
Për gazetarët dhe median, liria e shprehjes është e rëndësishme për shkak të rolit të tyre në zbulimin e të vërtetës, informimin e publikut, mbajtjen përgjegjës të politikanëve, kërkimit të llogaridhënies nga autoritetet publike dhe të drejtën që të jenë vazhdimisht skeptikë ndaj veprimeve të qeverisë.
Për këtë arsye, Gjykata Evropiane e të Drejtave të Njeriut (GJEDNJ) i sheh gazetarët si mbikëqyrës publikë, roli i të cilëve është të shpërndajnë informacione dhe ide përmes mjeteve të ndryshme si televizioni, gazetat, mediat online dhe mjeteve tjera të informimit.
Konsiderohet se është detyrë e shtypit për të dhënë informacione dhe ide mbi çështjet politike, si edhe në fusha të tjera të cilat kanë interes publik.
E bëmë këtë parantezë pasi, në Shqipërinë tonë të vogël, ku lajmet janë me shumicë, në çdo lloj fushe, priret që mediat të sulmohen kur preket një individ X ose Y. Në redaksinë e Vesa News mbrëmjen e kaluar kanë ardhur disa mesazhe ‘kërcënuese’ nga një individ i cili disa ditë më parë u përfshi në një aksident automobilistik në ‘Rrugën e Kombit’.
Për etikë profesionale nuk do të specifikojmë asnjë detaj nga identiteti i tij por do të merremi me fenomenin.
Në njërin prej mesazheve (siç shihet edhe në fotot e mëposhtme) thekson se Vesa News duhet të fshijë videon, e cila për hir të së vërtetës tregon vetëm skenën e aksidentit.
Kjo, pasi sipas individit, “jemi një media e papërfillshme vetëm me 200 followers në Instagram”.
Por meraku kryesor i ‘kërcënuesit’ nuk është Instagrami por profili në TikTok i Vesa News, pasi video në këtë platformë është bërë virale.
‘Kërcënuesit’ nuk i mjaftoi përplasja fizike me makinë, por kërkon të krijojë edhe një përplasje me median, me 200 followers siç edhe ai e shpall Vesa News.
Nga e gjithë kjo situatë e pakëndshme, mesazhi kryesor është se secila media ka ndikimin e saj në publik, sado pak e ndjekur qoftë.
‘Kërcënuesi’ e ka problemin me ne, median e vogël, dhe jo me mediat e mëdha të cilat e kanë ende videon e aksidentit në të gjitha rrjetet e tyre të informimit. Nëse një lajm i vërtetë, mendim, opinion arrin të shkojë tek masa, atëherë misioni i medias është përmbushur.
Shënim nga Redaksia e Vesa News për ‘kërcënuesin’:
Kushtetuta e Shqipërisë në Nenin e saj numër 22 vijon si më poshtë:
- Liria e shprehjes është e garantuar.
- Liria e shtypit, e radios dhe e televizionit është e garantuar.
- Censura paraprake e mjeteve të komunikimit ndalohet.