Mbi 1 mijë forca të policisë, mes tyre ato të rendit, FNSH, Shqiponjat dhe Garda e Republikës do të jenë sot në terren për mbarëvajtjen e protestës së thirrur nga opozita përpara Kryeministrisë. Demokratët dhe përkrahësit e opozitës pritet që të mblidhen rreth orës 17:00. Në gatishmëri do të jenë edhe forcat RENEA. Gjithashtu do të jenë në dispozicion, autobotë me ujë në rast se do të ketë incidente. Risia e kësaj proteste është fakti se ish-kryeministri Sali Berisha nuk do të jetë në shesh pasi ndodhet në arrest shtëpie.
Disa segmente do të bllokohen 2 orë para nisjes së protestës deri në përfundim të saj. Do të bllokohet Bulevardi “Dëshmorët e Kombit”, sheshi “Nënë Tereza”, rruga “Ismail Qemali”, nga kryqëzimi i rrugës së Elbasanit me rrugën “Ibrahim Rugova”, rruga “Papa Gjon Pali II”, bulevardi “Zhan D’Ark” dhe bulevardi “Bajram Curri”, nga kryqëzimi i Rrugës së Elbasanit me rrugën “Ibrahim Rugova”.
Ditën e djeshme, është izoluar edhe hyrja e Kryeministrisë në rast se do të ketë tentativa për ta sulmuar.