Agjencia rumune kundër krimit të organizuar ka kryer kontrolle shtesë në shtëpi në hetimin e saj ndaj influencuesit përçarës të mediave sociale Andrew Tate, tha një zyrtar të enjten.
Ramona Bolla, zëdhënëse e agjencisë, DIICOT, tha se kërkimet po kryhen në qarqet e Bukureshtit, Ilfov dhe Prahovës “për të marrë prova të mëtejshme”.
Tate, 36 vjeç, një qytetar me shtetësi britanike dhe amerikane, i cili ka 4.5 milionë ndjekës në Twitter, u arrestua më 29 dhjetor në kryeqytetin e Rumanisë, Bukuresht.
Kjo, me akuzën se ishte pjesë e një grupi të krimit të organizuar, trafikim njerëzor dhe përdhunim.
Vëllai i tij, Tristan, dhe dy gra rumune u arrestuan gjithashtu.
Të martën, një gjykatë la në fuqi masën e 30 dhjetorit të një gjyqtari për të zgjatur arrestimin e tyre nga 24 orë në 30 ditë.
Kërkimet e së enjtes vijnë një ditë pasi Tate humbi një apel të dytë këtë javë në një gjykatë në Bukuresht, ku ai kundërshtoi sekuestrimin e aseteve nga prokurorët në bastisjet e fundit të dhjetorit, duke përfshirë pronat, tokat dhe një flotë makinash luksoze.
Deri më tani janë sekuestruar edhe më shumë se 10 prona dhe toka në pronësi të kompanive të regjistruara te vëllezërit Tate.
DIICOT thotë se ka identifikuar gjashtë viktima në rastin e trafikimit të qenieve njerëzore, të cilat i janë nënshtruar “akteve të dhunës fizike dhe detyrimit psikologjik” dhe janë shfrytëzuar seksualisht nga anëtarët e grupit të dyshuar të krimit.
