Pas dorëheqjes së Lizz Truss, udhëheqjen e Partisë Konservatore do ta marrë Rishi Sunak që rrjedhimisht do të jetë kryeministri i ardhshëm i Mbretërisë së Bashkuar. Pas zgjedhjes së tij në krye të Partisë Konservatore, ai dha një deklaratë të shkurtër ku u shpreh se vendi i tij po përballej me sfida shumë të vështira ekonomike.
Ai përjashtoi mundësinë e zgjedhjeve të përgjithshme të parakohshme dhe paralajmëroi partinë e tij se duhej “të bashkoheshin ose të vdisnin”.
Ajo që u vu re gjatë fjalimit të tij të shkurtër, është nderimi që i bëri paraardhëses së tij Liz Truss, pasi sipas tij, edhe pse ajo drejtoi shumë pak në kohë, ajo kohë ishte kohë krize.
Sunak, 42 vjeç me origjinë nga India dhe një hindu i devotshëm do jetë lideri më i ri në më shumë se dy shekuj në Britaninë e Madhe.
Sunak, i cili u zgjodh për herë të parë si deputet në vitin 2015, u dallua menjëherë në politikë në kohën kur pandemia goditi Britaninë pasi ai krijoi një program “pezullimi pune” për të mbështetur miliona britanikë.
42-vjeçari Sunak lindi në Southampton, Anglinë jugore, nga prindër me origjinë indiane, të cilët kishin emigruar në Britani nga Afrika Lindore. Familja e tij emigroi në Britani në vitet 1960, një kohë kur shumë njerëz nga ish-kolonitë e Britanisë mbërritën në vend për të ndihmuar në rindërtimin e saj pas Luftës së Dytë Botërore.
Ai ndoqi shkollën elitare “Winchester College” dhe më pas, falë një burse, studimet e larta ai fillimisht i kreu në Oksford, ku studioi Filozofi, Politikë dhe Ekonomi. Pas diplomimit në Universitetin e Oksfordit, ai vazhdoi në “Universitetin e Stanfordit”. Atje ai takoi Aksatha Murthy, gruan e tij, babai i së cilës është miliarderi indian Narayana Murthy, themeluesi i gjigantit “Infosys Ltd”. Madje shumë pretendojnë se Aksata ka më shumë pasuri se mbretëresha Elizabeth.