Sindikata e punëtorëve të hekurudhave dhe transportit të Gjermanisë EVG ka njoftuar një grevë hekurudhore 50-orëshe duke filluar të dielën vonë dhe ka të ngjarë të ndikojë rëndë trafikun hekurudhor të hënën dhe të martën javën e ardhshme.
Disa sindikata të ndryshme në sektorin e transportit apo pranë tij prej muajsh janë në negociata me punëdhënësit, gjë që ka sjellë ndër të tjera një sërë grevash në transportin publik dhe aeroporte.
Sipas EVG, greva e ardhshme do të prekë operatorin kombëtar hekurudhor të Gjermanisë Deutsche Bahn (DB) dhe kompanitë e tjera të transportit ku nuk ka pasur përparim “të rëndësishëm” në javët e fundit, raporton Deutsche Welle.
“Durimi i anëtarëve tanë është me të vërtetë i shteruar tani. Ne jemi të detyruar të hyjmë në grevë për 50 orë për të treguar se sa serioze është situata”, tha negociatorja e EVG-së për pagat, Cosima Ingenschay.
Punëtorët do të largohen nga puna nga ora 22:00 e së dielës mbrëma deri në fund të ditës të martën.
Zakonisht greva të tilla ndikojnë në mënyrë dramatike në disponueshmërinë e shërbimeve hekurudhore, pa e ndalur plotësisht rrjetin, në varësi të burimeve që Deutsche Bahn mund të mobilizojë ende.
Në veçanti, për EVG, kjo është e ashtuquajtura “grevë paralajmëruese” e tretë e këtij lloji gjatë negociatave afërsisht dy-mujore të pagave.
Aksione të ngjashme ai kreu në fund të marsit dhe në fund të prillit.
Shefi i stafit të Deutsche Bahn Martin Seiler kritikoi vendimin e grevës, duke e quajtur atë një “grevë paralajmëruese” që nuk kërkon votën e anëtarëve.
“Kjo grevë e çmendur është krejtësisht e pabazë dhe krejtësisht e ekzagjeruar. Kjo është në fakt një grevë e plotë, por pa votën e anëtarëve. Miliona pasagjerë nuk do të jenë në gjendje të shkojnë atje ku duan – në shkollë, në punë, te të dashurit e tyre”, tha Seiler, duke pretenduar se një zgjidhje është në dispozicion.
Sipas EVG, shërbimet hekurudhore të mallrave mund të jenë veçanërisht të goditura. Seiler u pajtua me këtë vlerësim, duke thënë se vonesat mund të kenë një ndikim shumë përtej Gjermanisë.
“Duhet të merren parasysh efektet e rëndësishme në transportin e mallrave nëpër Evropë. Gjashtë nga 10 korridoret evropiane të mallrave përdorin rrjetin hekurudhor gjerman”, tha ai, transmeton Deutsche Welle.
