Erik Fullanin, djali i ish guvernatorit të Bankës së Shqipërisë, Ardian Fullani është ndaluar policia teksa ishte i armatosur.
Sipas njoftimit të policisë, Fullani u ndalua nga policia për t’u gjobitur me 20 mijë lekë të reja për xhamat e errësuara të makinës së tij, mirëpo gjatë kontrollit të bërë në automjetin e tij, u gjet edhe një pistoletë.
Në këtë kuadër, uniformat blu sqaruan se arma ishte me leje pasi Fullani punon si truprojë (bodyguard) në një firmë private.
“Në lidhje me një lajm të publikuar në portale, sipas të cilit pretendohet se në zonën e ish-Bllokut, është kapur me armë zjarri pistoletë, shtetasi E. F., ju sqarojmë se:
Ditën e sotme, rreth orës 10:45, shërbimet e Policisë kanë ndaluar për kontroll, në zonën e ish-Bllokut, automjetin me xhama të errësuar, me drejtues shtetasin E. F., 29 vjeç. Këtij shtetasi i është vendosur masa administrative 20 000 lekë të rinj, për xhamat e errësuar të automjetit.
Gjatë kontrollit fizik, shërbimet e Policisë i kanë gjetur një armë zjarri pistoletë 29-vjeçarit dhe për këtë arsye ai është shoqëruar në Komisariat, për verifikime të mëtejshme.
Pas verifikimeve ka rezultuar se arma që ai mbante ishte me leje dhe në vijim të veprimeve u bë njoftimi dhe dorëzimi i armës te drejtuesi teknik i firmës, ku ai punon (bodyguard), sipas procedurave përkatëse”, njofton policia.
