Gleard Gusholli, 31-vjeçari i cili dhunoi brutalisht dhe mbajti peng për një javë në banesë 28-vjeçaren me iniciale R.B,. u la sot në masën e sigurisë ‘’arrest me burg’’ nga Gjykata e Tiranës. Nga ana tjetër, personat e tjerë që akuzohen se kanë tentuar të fshehin ngjarjen u dha një masë më e lehtë sigurie. Më konkretisht për Bledi Kateshin, Erlin Kateshin, Besmir Nucellarin dhe Arjan Shetan, që akuzohen për moskallëzim krimi dhe përkrahje të autorit, u dha masa e sigurisë detyrim paraqitje.
Ndryshe nga sa e ka referuar Policia, organi i akuzës, rikualifikoi veprat penale, për plagosje, dhunë në familje nëpërmjet kanosjes dhe kërcënimit për vrasje si dhe heqje të paligjshme të lirisë. Avokatët e 31-vjeçarit kanë kërkuar masë më të lehtë sigurie ndaj të autorit. Sipas tyre, Gleard Gusholli në një periudhë prej 6 muajsh, konsumonte rregullisht antidepresantë e për pasojë ka bërë që mos të ketë qenë i kthjellët në veprimet që ka kryer ndaj të dashurës së tij.
E reja la përkohësisht të hënën ambientet e spitalit të Traumës ndërsa u rikthyes sërish, ku do të qëndrojë deri në fazën e rikuperimit të plotë.
Gusholli u arrestua dy ditë më parë së bashku me miqtë e tij të cilët ndihmuan që mos të zbulohej e vërteta si dhe të tentonte të arratisej. Në dëshminë e së resë, ajo pranoi se kishte konsumuar lëndë narkotike me detyrim dhe presion nga 31-vjeçari. Më tej ajo thotë se është dhunuar me sende të forta për një javë rresht në banesë dhe nuk është lënë që të dal.