“Merita të kemi gjetur vajzën, ajo ka vdekur në aksident”, “Qetësohu”, “Më premto që je mirë” ishin këto fjalët e një moderatoreje në një emision televiziv të transmetuar ditën e sotme, ku i jepte “live” lajmin një “fatkeqeje” se vajza e saj kishte vdekur…
Si mundesh t’i kërkosh të qetësohet një nëne që merr vesh në mënyrën më makabër që vajza e saj vetëm 22-vjeçe, të cilën kishte 4 muaj që po e kërkonte, nuk jeton më?
Si mundet t’i japësh këtë lajm në një transmetim të drejtpërdrejtë? Ku qëndrojnë ndjenjat humane, ku ka degraduar njeriu, ku ka degraduar gazetaria që po bëhet nga “kafshë” që po vdesin për disa klikime?
Askush nuk e ka njohur deri dje Meritën, por sot e njohëm si “viktima” e një medieje që ka shkuar përfund, që ka humbur çdo funksion të saj për informim dhe edukim dhe është kthyer në një mekanizëm që po shfrytëzon çdo qenie njerëzore për interesa të saj. Sot, edhe pse për të gjithë Merita ishte e panjohur, e kanë përjetuar po aq sa ajo atë lajm të kobshëm!
Ishte e tmerrshme, horror, e pakonceptueshme, e paimagjinueshme, vështirë për të gjetur fjalën që mund t’i shkojë kësaj skene dhe ajo që e bën edhe më anormale, ishte fakti se një staf i tërë ishte përgatitur për mënyrën se si do i jepej informacioni një nëne që po i digjej zemra të mësonte një lajm nga e vogla e saj. Edhe pse e dinin që 22 vjeçarja ka vdekur, moderatorja e pyeste nënën se “ku i kishte dyshimet, pse mund të ishte zhdukur vajza” duke ia ndezur shpresat, por më pas në momentin kulminant, me një suspancë për efekt “show”, a thua se po lexonte se kush do të eliminohej nga “Big Brother”, i thotë se e bija i ka vdekur në një aksident tragjik. Transmetimi vijonte me britmat e nënës për të bijën që kishte humbur….
Po shteti që e mbante 52 ditë në morg pse nuk kishte njoftuar familjarët?
Ishte një pamje makabër, që ndoshta as regjisorët në filma horror nuk do e kishin menduar si skenë, por në televizionet tona shqiptare tashmë janë bërë të zakonshme.
Ku është Autoriteti i Mediave Audiovizive? AMA reago urgjent ose rresht së ekzistuari! Media që po vret njerëz është një çështje shqetësuese dhe askush nuk duhet të heshttë!