Fran Marashi, i dënuar në mungesë me burg përjetë për masakrën e Urës Vajgurore në 1997 ka kërkuar rigjykim të çështjes. Gjykata e Larta ja ka rimundësuar të dënuarit ta rikthejë çështjen për rigjykim në themel në shkallën e Parë të Gjykatës së Posaçme pasi ai pretendon pafajësi.
Marashi ka pretenduar se është dënuar padrejtësisht dhe se në kohët kur gjykata ka dhënë vendimin, nuk ka pasur dijeni se ndaj tij zhvillohej një proces hetimor. Ai është ekstraduar nga Italia në vitin 2007, ndërsa në 2009, tentoi të arratisej nga burgu i Burrelit veprim për të cilin deklaroi se e bëri për të tërhequr vëmendjen që procesi ndaj tij të rihapej.
26 vite më pare për ngjarjen ku u vranë 5 persona dhe u plagosën 6 policë u dhanë disa dënime me burg përjetë për pjesëtarët në atë ngjarje. Gjyqtari Erjon Bani dhe prokurori Alfred Shehu janë pjesë e gjykimit ndërsa shqyrtimi do të marrë kohë për shkak të njoftimit të familjarëve të viktimave për rihapjen e procesit.