Kundërofensiva ukrainase që synon rimarrjen e territoreve të aneksuara ilegalisht nga Rusia ka filluar. Mirëpo sipas presidentit rus, Vladimir Putin kjo kundërofensivë ka dështuar.
“Ka filluar ofensiva ukrainase, kjo dëshmohet nga përdorimi i rezervave strategjike ”, tha presidenti rus, duke shtuar se “Forcat e Armatosura të Ukrainës nuk i arritën qëllimet e tyre në asnjë fushë për shkak të guximit të ushtarëve rusë dhe organizimit korrekt të trupave”.
“Mund të themi se të gjitha përpjekjet kundërsulmuese të Kievit kanë dështuar, por Forcat e Armatosura të Ukrainës janë ende duke sulmuar.”shtoi Putin. Sipas tij, ditët e fundit ukrainasit kanë pësuar humbje të konsiderueshme në front, duke tejkaluar normën “klasike”.
Rusia tha sot se ka zmbrapsur sulmet e rënda ukrainase në rajonet Zaporizhia dhe Donetsk , duke vrarë të paktën 1000 ushtarë ukrainas dhe duke shkatërruar dhjetëra tanke dhe automjete të blinduara.
Më shumë se 15 muaj pas luftës më të madhe tokësore të Evropës që nga fillimi i Luftës së Dytë Botërore, Putin thotë se Shtetet e Bashkuara dhe aleatët e saj perëndimorë po dërgojnë armë në Ukrainë si pjesë e një lufte në zgjerim të prokurës që synon të gjunjëzojë Rusinë.