Katër komunave në departamentin jugor francez të Pyrenees-Orientales iu tha të mos pinin ujë rubineti për shkak të niveleve të ulëta të ujit – një lëvizje praktikisht e paprecedentë në fillim të vitit.
Rregulli i ri hyri në fuqi të premten dhe do të prekë rreth 3,000 njerëz në komunat Corbère, Corbère-les-Cabanes, Saint-Michel-de-Llotes dhe Bouleternère, të vendosura në perëndim të Perpignan në ultësirat e Pyrenees, sipas France Bleu.
Niveli i ujit në pusin që furnizon fshatrat “është në nivelin më të ulët, vetëm 30 centimetra mbi pompën”, tha për AFP kreu i bordit lokal të ujit, Jean-Pierre Saurie.
Bashkia e Corbère-les-Cabanes ndau një deklaratë për shtyp duke informuar banorët përmes Facebook, duke shpjeguar se “uji i rubinetit do të ndalohet për konsum derisa Agjencia Rajonale e Shëndetit ta autorizojë atë”.
Bashkia do të japë një pako me ujë (gjashtë shishe 1.5 litërshe) për person në javë, pa pagesë, derisa të rikthehet konsumi i ujit të rubinetit.
Tashmë nën kufizimet e ujit, bashkia u kujtoi banorëve se është e ndaluar të ujitet kopshtet, të lahen makinat dhe të mbushen pishinat.
Një tjetër pus i përdorur nga fermerët vendas është duke u testuar, por ndërkohë autoritetet lokale kanë grumbulluar ujë të mjaftueshëm në shishe për 10 ditë.
“Është e jashtëzakonshme. Ne kurrë nuk kemi pasur një thatësirë si kjo”, shtoi Saurie.
Rajoni, i cili kufizohet me Spanjën, ka qenë një nga më të prekurit nga një thatësirë dimërore që ka parë reshje lokale shiu në rreth gjysmën e nivelit të tij normal, sipas zyrës kombëtare të motit.
Kufizimet e ujit në jug të Francës nuk janë të pazakonta gjatë verës, por është jashtëzakonisht e rrallë të ketë kufizime kaq të rënda në prill.
