Më 6 gusht 2022, Florind Belliu dhe bashkëshortja e tij, Ornela, humbën jetën pasi ranë nga kati i gjashtë i pallatit ku banonin në New York.
Çifti, 35 dhe 28 vjeç gjetën vdekjen dhe lanë pas 2 fëmijë të mitur. Mësohet se Florind Belliu dhe Ornela Shehi do të përcillen sot për në banesën e fundit.
“Nesër, më 10 Gusht 2022 nga ora 2 – 9 Pm në adresën e Funeralit: Farenga Brothers Funeral Home 920 Allerton Ave Bronx, NY 10469 (718) 654-0500, komuniteti shqiptar në Neë York e më gjërë do të përcjellë për në banesën e përjetshme bashkëshortët Ornela Shehi dhe Florind Belliu. Bashkëshortët u ndanë nga jeta tragjikisht duke lënë pas 2 fëmijë të mitur, shumë dhimbje, trishtim e lot te familjarët, miqtë e çdo shqiptar që u trondit thellë nga vdekja e tyre. Largimi për në amshim i dy të rinjve me shumë ëndrra në tokën e premtuar, shkaktoi një tragjedi të vërtetë për rrethanat, pasojat dhe misterin që morën me vete në qiell. Federata Vatra, Gazeta Dielli e mbarë komuniteti shqiptar në Amerikë shpreh ngushëllimet më të thella familjes, të afërmve e miqve të Ornelës e Florindit. Shpirti i tyre pushoftë në paqen e përjetshme e Zoti i forcoftë familjen. Paçin fëmijët me jetë të gjatë. U kujtofshin e mos u harrofshin kurrë përjetë”, njofton Gazeta Dielli.
Ende nuk ka një version zyrtar si ndodhi ngjarja e rëndë, por mendohet që Florindi ka shtyrë nga lartësia gruan e tij shtatzënë dhe më pas është hedhur vetë, ndërsa thuhet që vuante nga problemet e shëndetit mendor.
