Presidenti i Malit të Zi, Milo Gjukanoviç, deklaroi se nuk ka të dhëna se autoritetet shtetërore apo institucionet e Malit të Zi kanë marrë pjesë në ndonjë mënyrë në përpjekjen ruse për të sulmuar Moldavinë, transmeton agjencia e lajmeve Beta.
Gjukanoviç tha se mund të bëhet fjalë vetëm për “individë apo organizata terroriste që e vënë veten në shërbim të interesave ruse për të destabilizuar vendet fqinje”.
“Ne e dimë se një pjesë e qytetarëve të Malit të Zi, si dhe të vendeve të tjera në rajon, për fat të keq, demonstrojnë se mbështesin agresionin rus,” tha Gjukanoviç.
Presidenti i Malit të Zi u takua me Presidenten e Moldavisë, Maja Sandu, në Konferencën e Sigurisë në Mynih.
Sandu tha më 13 shkurt se Rusia planifikon të përdorë diversantë të huaj për të përmbysur udhëheqjen e vendit të saj, për të ndaluar anëtarësimin e saj në Bashkimin Evropian dhe për ta përdorur këtë në luftën kundër Ukrainës.
Sipas saj, ky plan përfshin shtetas të Rusisë, Malit të Zi, Bjellorusisë dhe Serbisë që hyjnë në Moldavi.
Ditën kur Sandu shpalli akuzat për ekzistencën e një plani të tillë, tifozët e ekipit të futbollit të Partizanit nga Beogradi u kthyen nga Moldavia.
Autoritetet moldave nuk kanë njoftuar nëse vendimi për të luajtur ndeshjen pa audiencë dhe pretendimet e presidentit të vendit në lidhje me planin për të rrëzuar udhëheqjen kanë lidhje.
Një ditë më vonë, zyrtarët në Beograd dhe Podgoricë thanë se nuk kishin një informacion të tillë dhe i kërkuan Moldavisë sqarime shtesë në lidhje me pretendimet e saj.
Më 14 shkurt, Rusia hodhi poshtë akuzat e presidentit të Moldavisë se Moska po planifikonte të destabilizonte ish-republikën sovjetike.
Ndryshe, gjatë vitit të kaluar Moldavia, shtet fqinj me Ukrainën, është përballur me një sërë shqetësimesh sigurie, pasi në territorin moldav kanë rënë fragmente të raketave ruse.
Moldavia është përballur gjithashtu me ndërprerje të energjisë pasi Ukraina ndaloi eksportet e energjisë për shkak të sulmeve ajrore ruse në infrastrukturën e saj kritike.
