“Dezinformimi dhe lajmet e rreme paraqesin rrezik serioz për sigurinë e Maqedonisë së Veriut. Ata janë një nga faktorët kryesorë që shkaktojnë polarizim, ndarje dhe konflikte në shoqëri”, thotë Petrit Saraçini, drejtor i Institutit për Media dhe Analiza në Shkup, i cili monitoron mediat e shkruara, elektronike dhe sociale në përputhje me standardet profesionale, në një intervistë për Radion Evropa e Lirë.
Saraçini thotë se dezinformatat që kanë fituar terren në Maqedoninë e Veriut e kanë origjinën në Rusi dhe Kinë, por edhe në Serbi dhe kanë të bëjnë kryesisht me mbrojtjen e agresionit rus në Ukrainë, dhe prezantimin e BE-së dhe NATO-s si institucione që nuk respektojnë të drejtat e njeriut dhe vlerat familjare.
Ndër të tjera ai thotë se “në luftën kundër dezinformimit, rol të rëndësishëm luan edhe shkrim-leximi mediatik, i cili duhet të zhvillohet edhe më shumë në shkolla”.
Sipas tij, mediat duhet të marrin më shumë përgjegjësi në luftën kundër dezinformatave, pasi ato rrezikojnë edhe ekzistencën e tyre”, transmeton Radio Evropa e Lirë.
Petrit Saraçini është një gazetar shumë aktiv me origjinë shqiptare në Maqedoninë e Veriut.