Prokuroria e Tiranës ka nisur ditën e sotme hetimet në lidhje me vdekjen e 3-vjeçarit pas ndërhyrjes që pati në një klinikë dentare disa ditë më parë.
3-vjeçari B.S., humbi jetën pas një ndërhyrje kirurgjikale në klinikën dentare ‘Splendent’. Prokuroria ka sekuestruar kartelat klinike në QSUT por edhe në klinikën private ku është bërë ndërhyrja. Babai ka konfirmuar se fëmija e tij ka qenë në gjendje të rëndë shëndetësore pasi ka bërë ndërhyrjen dhe kanë vendosur ta dërgojnë fëmijën në QSUT, pasi klinika nuk po përgjigjej në telefon.
Prokuroria gjithashtu ka kërkuar nga policia që të sekuestrohen të gjitha kamerat e bizneseve afër klinikës dentare. Dy mjekët të cilët do të merren në pyetje janë Roland Xhaxho dhe Ina Xhaxho.
Sipas Kodit Penal, i ndryshuar në vitin 2019, nga “Mjekim i pakujdesshëm” në “Neglizhenca në trajtimin mjekësor” i ka lehtësuar ndjeshëm pozitat e mjekëve, duke u konsideruar në kundra-vajtje penale dhe jo në vepër penale, çfarë nuk parashikon arrestim në momentin e konstatimit, deri në përfundim të hetimeve.
Pritet përgjigjja nga Instituti i Mjekësisë Ligjore i cili do të konfirmojë nëse fëmija ka vdekur nga mbidoza apo ka pasur probleme të mëparshme shëndetësore. Nëse konfirmohet mbidoza e narkozës atëherë mund të ketë edhe arrestim te anestezistit Roland Xhaxho.