Denion Meidani, djali i ish-presidentit Rexhep Meidani, është emëruar ambasador i Shqipërisë në Maqedoninë e Veriut. Presidenti Begaj ka dekretuar emërimin e tij dhe lirimin nga detyra të ambasadorit Fatos Reka. Meidani pak ditë më parë prezantoi platformën e tij para anëtarëve të Komisionit të Jashtëm të Kuvendit të Shqipërisë dhe mori mbështetje të plotë.
“Maqedonia e Veriut është më shumë se një fqinj i mirë; është partner, aleat dhe mbështetës në rrugën tonë të përbashkët drejt proceseve rajonale dhe eurointegruese”, tha Meidani para anëtarëve të Komisionit të Jashtëm, të kryesuar nga Mimi Kodheli.
Gjatë një seance dëgjimore të zhvilluar përmes platformës online “Zoom”, ai veçoi si një pikë kyçe se një nga prioritetet e tij kryesore është të forcojë bashkëpunimin rajonal dhe të avancojë marrëdhëniet mes dy kombeve.
“Marrëveshjet e nënshkruara mes dy qeverive jo vetëm që institucionalizuan më tej marrëdhëniet tona, por gjithashtu kanë dhe do të vazhdojnë të ndikojnë ndjeshëm në përmirësimin dhe lehtësimin e jetës së qytetarëve tanë. Bashkëpunimin duhet ta konsiderojmë si një histori suksesi. Me vizion dhe kurajo, ne bashkërisht ndërmarrim reforma të rëndësishme. Bashkëpunimi rajonal do të jetë prioriteti im kryesor. Marrëdhëniet mes dy vendeve tona shërbejnë si shembull i bashkëpunimit në rajon dhe unë zotoj se do të përpiqem për avancimin e mëtejshëm të këtyre marrëdhënieve”, tha ai.
