Agron Metushi ka mbetur i vrarë nga plumbat e kallashnikovit në Shkodër, pas një sherri banal në lokal. Autori i krimit është Alfons Patushani, i cili është konfliktuar me viktimën në lokal, pastaj ka shkuar në shtëpi për të marrë armën.
Ai ka pritur që Metushi të dalë nga lokali dhe e ka qëlluar për vdekje. Ngjarja ndodhi rreth orës 03:00 të mëngjesit.
Si nisi sherr mes viktimës dhe autorit:
Disa detaje mësohen nga vrasja e ndodhur në fshatin Shelqet të Bashkisë Vau Dejës në orët e para të mëngjesit të sotëm. Viktima Agron Metushi dhe autori i dyshuar Alfons Palushani që u arrestua nga policia menjëherë pas ngjarjes së rëndë ndodheshin në një lokal, por në tavolina të ndryshme.
Gjatë qëndrimit në lokal viktima dhe autori kanë fyer njëri-tjetrin në distancë. Rreth orës 3 të mëngjesit, shtetasi Alfons Palushani ka marrë një armë zjarri automatik kallashnikov dhe ka qëlluar në oborrin e lokalit shtetasin Agron Metushi i cili mbeti i vdekur në vend.
Menjëherë policia shkoi në vendngjarje dhe përvec trupit të viktimës gjeti aty edhe pronarin e lokalit i cili po priste. Sipas burimeve dyshohet se personat e përfshirë në ngjarje kanë qenë të alkolizuar, nga veprimet e shpejta policore është bërë i mundur arrestimi i autorit te dyshuar Alfons Palushani.
Njoftimi i policisë
Më datë 23.08.2022, rreth orës 03:00, në fshatin Shelqet, Vau i Dejës, pas një konflikti për motive të dobëta, dyshohet se shtetasi A.P., 37 vjeç, banues në fshatin Stajkë, Vau i Dejës, ka vrarë me armë zjarri shtetasin A. M., 51 vjeç, banues në Shkodër. Nga veprimet e shpejta dhe hetimet paraprake të kryera nga Policia, dyshohet se konflikti për motive të dobëta ka nisur në lokalin e fshatit dhe menjëherë shtetasi A.P., ka shkuar në banesë ka marrë armën e zjarrit kallashnikov dhe në momentin që shtetasi A.M. ka hipur në automjetin e tij për tu larguar shtetasi A.P. e ka qëlluar me armë zjarri. Grupi hetimor nën drejtimin e Prokurorisë vijon punën në vendngjarje për sqarimin e plotë të rrethanave dhe dokumentimin ligjor të kësaj ngjarjeje. Shërbimet e Policisë janë vënë në ndjekje të autorit dhe vijon kontrolli i zonës për kapjen e tij.