Të hënën në mëngjes, një grup eko-aktivistësh nga lëvizja Last Generation spërkatën bojë në fasadën e Senatit Italian në Romë.
Për këtë shkruan Ansa.
Karabinierët ndërhynë dhe ndaluan pesë aktivistë të “Brezit të fundit”.
Pesë të arrestuarit ndodhen aktualisht në zyrat e Drejtorisë kryesore të Policisë, po zbardhet pozicioni i tyre.
Në një deklaratë, aktivistët “justifikojnë” sulmin, duke shpjeguar se “në themel të gjestit qëndron dëshpërimi që lind nga një sërë statistikash dhe të dhënash gjithnjë e më alarmante në lidhje me kolapsin mjedisor dhe klimatik që tashmë ka filluar, dhe mosinteresimin e botës politike për atë që mund të jetë gjenocidi më i madh në historinë njerëzore”.
Sulmi i rrufeshëm, siç sqarojnë vetë aktivistët, ndodhi në orën 07:45 me ndihmën e një rryme bojë portokalli të spërkatur nga aparatet e zjarrit.
Aktivistët thanë se “një dritë e vogël frymëzimi për vitin 2023 vjen nga Presidenti i Republikës, Sergio Mattarella, i cili në fjalimin e tij drejtuar kombit më 31 dhjetor deklaroi se “sfida, më tepër, është të planifikosh me guxim për të nesërmen. Të mbrosh planetin, dhe rrjedhimisht të ardhmen tonë, të ardhmen e njerëzimit, do të thotë, para së gjithash, të zgjidhësh konkretisht çështjen e tranzicionit të energjisë”.
Presidenti i Senatit, Ignazio La Russa, dënoi veprimin e ekoaktivistëve, duke theksuar se nuk ka “asnjë alibi, asnjë justifikim për një akt që ofendon të gjitha institucionet dhe se vetëm falë gjakut të ftohtë të karabinierëve nuk u përshkallëzua në dhunë”.
Sulmi u dënua gjithashtu nga Ministri i Mjedisit dhe Sigurisë së Energjisë të Italisë, Gilberto Pichetto Fratin, si dhe nga politikanët e mazhorancës dhe opozitës.
“Për ta, si dhe për ata që pikturojnë vepra arti në mbarë botën, duke besuar se në këtë mënyrë po dërgojnë një mesazh në favor të mbrojtjes së mjedisit”, tha Pichetto, “dua t’ju kujtoj se lufta kundër ndryshimit të klimës është në qendër të vëmendjes së qeverive në mbarë botën”.
Sipas ministrit, “është e rëndësishme që të rinjtë dhe të gjithë qytetarët t’i kushtojnë vëmendje këtyre çështjeve, por është mirë që ata ta dinë se të gjitha aktet vandaliste, edhe nëse janë demonstrative, janë të papranueshme dhe nuk do të mbeten pa u ndëshkuar”.
Kujtojmë se aktivistët e “Brezit të fundit” së fundmi organizojnë rregullisht aksione për të tërhequr vëmendjen në muze dhe galeri arti, duke u ngjitur me ekspozita apo duke i lyer me bojë, por në mënyrë të tillë që të mos i dëmtojnë.
