Duket se mbreti Charles III, sapo të kurorëzohet si i tillë, do ta nisë mbretërimin me një thyerje tradite mbretërore disa vjeçare. Ai po konsideron që mos të jetojë në Pallatin Buckingham. Lajmin e kanë bërë të ditura mediat britanike duke aluduar se ndoshta, mbreti i ardhshëm do të jetojë në Clarence House.
Charles III ka plane të tjera për Pallatin Buckingham që ndodhet në mes të një projekti restaurimi prej 369 milionë £ që priten të zgjasë deri në vitin 2027. Mbreti po konsideron hapjen e Pallatit Buckingham dhe kopshtet e tij për publikun gjatë gjithë vitit. Sipas tij, kjo gjë do të rriste ndjeshëm të ardhurat përmes shitjeve të biletave dhe do të zvogëlonte sasinë e fondeve të taksapaguesve që kërkohen për mirëmbajtjen e pallateve dhe rezidencave mbretërore.
Gjithsesi, Pallati Buckingham do të vazhdojë të jetë mjedisi për raste të mëdha diplomatike. Ky pallat ka shërbyer si rezidenca zyrtare në Londër e sovranëve britanikë që nga viti 1837.