Britania po konsideron furnizimin e Ukrainës me tanke për herë të parë për të ndihmuar vendin të luftojë forcat ruse, raportoi Sky News të hënën, duke cituar burime të paidentifikuara.
Diskutimet po zhvillohen “për disa javë” për dërgimin e tankut kryesor të betejës Challenger 2 të Ushtrisë Britanike në Ukrainë, tha Sky, duke cituar një burim perëndimor me njohuri për bisedat.
Furnizimi me tanke do të përfaqësonte një hap të rëndësishëm në mbështetjen perëndimore për Ukrainën, por qeveria britanike nuk ka marrë ende një vendim përfundimtar për këtë çështje, shtoi raporti.
Sky citoi një burim të paidentifikuar duke thënë se Britania mund të ofrojë rreth 10 tanke Challenger 2.
Challenger 2 është një tank luftarak i projektuar për të sulmuar tanke të tjera dhe ka qenë në shërbim me ushtrinë britanike që nga viti 1994.
Ai është vendosur në Bosnjë dhe Hercegovinë, Kosovë dhe Irak, sipas ushtrisë britanike.
