Ish-kryeministri Sali Berisha u mor sot në pyetje nga prokurorët e SPAK-ut, lidhur me hetimet për privatizimin e ish-kompleksit Partizani. Berisha qëndroi për rreth 1 orë e gjysmë në ambientet e SPAK-ut.
Para kamerave, ish-kryeministri sulmoi dy prokurorët e SPAK, Arben Kraja dhe Enkeleda Millonai, të cilët i quajti një grup të terrorizuar. Berisha tha se në SPAK edhe kryeministri Rama.
“Sapo përfundoi seanca e takimit me anëtarët e grupit të strukturuar kriminal të SKAP-it të partisë, Altin Dumani në mungesë, Arben Kraja i pranishëm, Enkeleda Millonai e pranishme. Gjeta aty një grup të terrorizuar.
Në një karrige bosh qëndronte McGonigal, në karrigen tjetër ishte ulur Edi Rama dhe unë, në emër tuaj dhe të PD-së u deklarova sa vijon: Pasi i pyeta pse jetoni në këtë terror kaq të madh këtu ju? Të hysh aty, hyn si në një, nuk mund ta imagjinoni se çfarë masash sigurie, a thua se ka kush kohë të merret me ta…
Pasi ju deklarova se Sali Berisha është këtu në përputhje me atë parim që ai beson, se çdo njeri që thirret për hetim nga organet e hetuesisë, duhet të paraqitet për t’u marrë në pyetje dhe kjo ka qënë qëllimi më kryesor i amendamentit, ndryshimit të Kushtetutës në vitin 2012, në të cilin PD, qeveria e saj bëri të mundur të hiqet çdo pengesë për hetimin e deputetëve”, deklaroi Berisha.
Lidhur me pyetjet që iu drejtuan nga SPAK, Berisha listoi disa prej tyre, të cilat i quajti “trillime” të SPAK-ut.
“Mjeranë që ripërsërisnin trillimet e tyre. Se ligji thoshin… ku u tregova ligjin e 2004 dhe nenin për shpronësimet. Por ata e kanë fshehur. Pyetje konkrete: kishin marrë një listë personash, a i njeh ti këta. Se nga e kishin marrë listën. Më pyetën se çfarë pune ka bërë Malltezi. Ishin jashtë procedurës. Ke dijeni ti për ardhjen e atij gjeneralit. Ai s’ka asnjë lidhje me privatizimin. Pse u ndryshua ligji i sporteve. Në 2007 u bë të jepej me koncesion, në 2008 u rikthye te ligji i pronave”, tha Berisha.