Autoritetet saudite kanë sekuestruar më shumë se 12.7 milionë pilula amfetamine të fshehura në një ngarkesë frutash që mbërriti në portin e Jeddah (Perëndimor), njoftoi të martën (25 prill) agjensia zyrtare e lajmeve SPA.
Dy egjiptianë, një jemenas dhe një sirian u arrestuan, tha ajo.
Agjencia SPA nuk ka specifikuar origjinën e ngarkesës me fruta (shegë), as datën e sekuestrimit të saj.
Mbretëria e Gjirit konsiderohet si përdoruesi kryesor i kaptagonit, një droge nga familja e amfetaminave.
Agjencia SPA nuk tha nëse droga e sekuestruar ishte kaptagon, e cila po bën kërdinë në Arabinë Saudite dhe prodhohet në Siri.
Kaptagon, dikur i lidhur me xhihadistët e grupit të Shtetit Islamik, ka krijuar një industri të paligjshme me vlerë më shumë se dhjetë miliardë dollarë dhe ka mbështetur regjimin sirian të Bashar al-Assad, sipas një hetimi të AFP-së në nëntor.
Bashkimi Evropian sanksionoi të hënën, më 25 prill, kushërinjtë e presidentit sirian dhe disa të afërm të tij, të akuzuar për trafikim kaptagoni.
Dy prej tyre tashmë ishin sanksionuar për të njëjtat arsye nga Shtetet e Bashkuara dhe Britania e Madhe.
Ryad-i i kishte ndërprerë marrëdhëniet me Damaskun në vitin 2012, por të dy vendet kohët e fundit janë afruar më shumë, në një kontekst të tensionit rajonal.
Gjatë një takimi më 13 prill në Jeddah midis Faisal Moqdad, kreut të diplomacisë siriane, dhe homologut të tij saudit Faisal ben Farhane, të dy zyrtarët theksuan “rëndësinë e forcimit të bashkëpunimit në luftën kundër kontrabandës dhe trafikimit të narkotikëve”, sipas një deklarate të përbashkët.