Akulli i detit Antarktik ka të ngjarë të jetë tkurrur në një nivel të ulët rekord, kanë njoftuar shkencëtarët amerikanë, sasia më e ulët në 45 vjet të të dhënave satelitore.
Qendra Kombëtare e Borës dhe Akullit (NSIDC) në Universitetin e Kolorados Boulder raportoi se akulli i detit Antarktik kishte rënë në 1.79 milionë kilometra katrorë më 21 shkurt.
Kjo është më pak se rekordi i mëparshëm i vendosur në 2022 me 136,000 kilometra katrorë.
Shkencëtarët e NSIDC theksuan se informacioni i publikuar nuk është përfundimtar pasi që shkrirja e mëtejshme e akullit në fund të sezonit është ende e mundur, shkruan AFP.
Ata njoftuan se do të publikojnë numrin përfundimtar për madhësinë e akullit në fillim të marsit.
Shkrirja e akullit të detit ekspozon fletët më të trasha të akullit që mbështesin tokën Antarktike ndaj valëve dhe temperaturave më të larta.
Shkrirja e akullit të detit nuk ka efekt të dukshëm në nivelin e detit, sepse akulli është tashmë në ujin e oqeanit, por ai akull rrethon shtresat e mëdha të akullit të Antarktidës, zgjerimet e akullnajave të ujërave të ëmbla që kërcënojnë rritjen katastrofike të nivelit të detit gjatë shekullit nëse vazhdojnë të shkrihen me ngritjen e temperaturave globale.
Cikli Antarktik kalon nëpër variacione të rëndësishme vjetore – shkrirja në verë dhe ngrirja në dimër.
Kontinenti nuk ka përjetuar shkrirjen e shpejtë që ka goditur shtresat e akullit të Grenlandës dhe Arktikut për shkak të ngrohjes globale në katër dekadat e fundit.
Por ritmi i shkrirjes që nga viti 2016 ngre shqetësime se një prirje e konsiderueshme rënëse mund të mbizotërojë.
Shkrirja e akullit të detit është një problem sepse ndihmon në përshpejtimin e ngrohjes globale.
Kur akulli i bardhë i detit, i cili reflekton deri në 90 për qind të energjisë së diellit përsëri në hapësirë, zëvendësohet nga deti i errët dhe pa akull, uji thith një përqindje të ngjashme të nxehtësisë së diellit.
Në nivel global, viti i kaluar ishte i pesti ose i gjashti më i ngrohtë i regjistruar, pavarësisht ndikimit ftohës të fenomenit natyror të motit La Nina.
