Një operacion i shtrirë në 3 qarqe, ka vënë në pranga 6 persona të cilët kryenin trafik armësh drejt Kosovës. Mësohet se pas një hetimi disa mujor në Kukës, Durrës dhe Dibër është arritur të vihen në pranga Rrahman Skuka 28 vjeç, banues në Dibër, Bajram Shiti 24 vjeç, banues në Bulqizë, Bukurosh Neziri 33 vjeç, banues në Durrës, Ulvi Huna 27 vjeç, banues në Dibër, Hysni Hani 59 vjeç, banues në Durrës dhe Kujtim Bajramaj 61 vjeç, banues në Fushë-Krujë.
Ato u kapën në një karburant, ku iu gjetën me vete 1 automatik, 1 pistoletë “Glock”, sasi municioni luftarak, si dhe me shuma prej 222.000 lekësh dhe 710 eurosh. Ndaj tyre rëndon akuza për veprën penale “Mbajtja pa leje e armëve, armëve shpërthyese dhe i municionit”, kryer në bashkëpunim.
Nga ana tjetër, vijojnë hetimet për identifikimin dhe vënien para përgjegjësisë ligjore të personave të tjerë të implikuar në veprimtarinë kriminale të trafikimit të armëve të zjarrit drejt Kosovës.
NJOFTIMI I POLICISË SË SHTETIT:
Finalizohet me sukses operacioni policor i koduar “Rrugëtimi”. Operacioni, i shtrirë në 3 qarqe, Kukës, Durrës dhe Dibër. Sekuestrohen armë zjarri, municion luftarak dhe shuma parash.
Në vijim të punës për goditjen e veprimtarive kriminale të trafikimit të armëve të zjarrit apo të mbajtjes së tyre pa leje, pas një hetimi disamujor, për një grup shtetasish që trafikonin armë zjarri drejt Kosovës, u bë i mundur finalizimi i operacionit policor të koduar “Rrugëtimi”.
Në kuadër të këtij operacioni të shtrirë në 3 qarqe, Kukës, Durrës dhe Dibër, në bashkëpunim me Prokurorinë pranë Gjykatës së Rrethit Gjyqësor Kukës, u arrestuan në flagrancë shtetasit:
-Rr. S., 28 vjeç, banues në Dibër; B. SH., 24 vjeç, banues në Bulqizë; B. N., 33 vjeç, banues në Durrës; U. H., 27 vjeç, banues në Dibër; H. H., 59 vjeç, banues në Durrës, dhe K. B., 61 vjeç, banues në Fushë-Krujë, për veprën penale “Mbajtja pa leje e armëve, armëve shpërthyese dhe i municionit”, kryer në bashkëpunim.
Këta shtetas u kapën në flagrancë nga shërbimet e Policisë, në ambientet e jashtme të një pike karburanti, me 1 armë zjarri automatik, 1 armë zjarri pistoletë tip “Glock”, sasi municioni luftarak, si dhe me shuma prej 222.000 lekësh dhe 710 eurosh, të cilat u sekuestruan në cilësinë e provës materiale.
Vijojnë hetimet për identifikimin dhe vënien para përgjegjësisë ligjore të personave të tjerë të implikuar në veprimtarinë kriminale të trafikimit të armëve të zjarrit drejt Kosovës. Materialet i kaluan Prokurorisë pranë Gjykatës së Shkallës së Parë Kukës, për veprime të mëtejshme.