Presidenti Vuçiç kërkon një mandat të ri për partinë e tij në zgjedhjet e sotme të jashtëzakonshme parlamentare dhe ato lokale ku synon shumicën absolute. Në Serbi rreth 6.5 milionë kanë të drejtën e votës në zgjedhjet e jashtëzakonshme parlamentare dhe ato bashkiake.
Qendrat e votimit u hapën në orën 07:00 dhe pritet të mbyllen në orën 20:00. Në garë janë 18 parti dhe koalicione konkurrojnë për 250 vende deputetesh në Parlament. Pragu për të hyrë në parlament është 3% e votave.
‘Pres një pjesëmarrje të mirë dhe një fitore vendimtare. Kur them fitore vendimtare, unë besoj tek rezultati i koalicionit Serbia nuk duhet të ndalet do të jetë afër shumicës absolute në Parlament. Unë pres që Serbia të bëjë shumë punë të rëndësishme në vitet në vijim’, u shpreh presidenti i Serbisë teksa hodhi votën e tij.
Këto janë zgjedhjet e pesta që organizohen në Serbi prej vitit 2012 dhe mbahen vetëm 18 muaj pas organizimit të procesit të fundit zgjedhor.
Zgjedhjet e përgjithshme u mbajtën më 3 prill 2022 por Vuçiç zgjodhi që t’i bënte këto zgjedhje të parakohshme për të sfiduar protestat e opozitës.