Në përvjetorin e 28-të të gjenocidit në Srebrenicë, Bashkimi Evropian ka tërhequr vërejtjen se nuk mund të tolerohet mohimi i gjenocidit nga kriminelët e luftës. Kjo ka qenë retorika në një deklaratë të përbashkët të përfaqësuesit të lartë të BE-së për politikën e jashtme dhe siguri, Josep Borrell, dhe komisionari për zgjerim, Oliver Varhelyi.
“Para 28 vjetësh një prej faqeve më të errëta të historisë së Evropës u shkrua. Ne ndajmë ngushëllimin dhe dhimbjen e familjeve dhe miqve të viktimave dhe të mbijetuarve të gjenocidit në Srebrenicë. Evropa kujton përgjegjësinë e saj dhe dështimin për t’i mbrojtur. Sot, kur lufta po zhvillohet përsëri në kontinentin e Evropës, ne zotohemi që të veprojmë më mirë për të mbrojtur paqen dhe të mbrojmë jetën e njerëzve”, – thuhej në një pjesë të deklaratës.
Dy zyrtarët e Bashkimit Evropian shprehën mbështetjen për aspiratat evropiane të Bosnjë-Hercegovinës dhe sovranitetin e saj. “Në shënimin e përvjetorit të pasojave të konfliktit të armatosur, Bashkimi Evropian përsërit përkushtimin e vet për sovranitetin dhe integritetin territorial të Bosnje e Hercegovinës. Si vend kandidat, e ardhmja e Bosnje e Hercegovinës është në BE”, – thuhej në deklaratë.
Borrelli dhe Varhelyi bënë thirrje për pajtim dhe ndërtimin e paqes, bazuar në të vërtetën.
“Pajtimi mund të ndërtohet vetëm mbi të vërtetën, paqen dhe drejtësinë. Nuk mund të ketë tolerancë për mohimin e gjenocidit, revizionimit historik dhe madhërimit të kriminelëve të luftës. Liderët, qytetarët e Bosnjë e Hercegovinës kanë përgjegjësi për të punuar së bashku për të ndërtuar një të ardhme më të mirë bazuar në dialog dhe mirëkuptim të ndërsjellë, të forcojnë dhe mbrojnë paqen dhe dinjitetin njerëzor në të mirë të të gjitha gjeneratave”, – thanë ata.
Në Srebrenicë në korrik 1995, forcat e ushtrisë serbe në Bosnjë kanë vrarë rreth 8.000 burra dhe djem. Gjykata për krime të luftës në ish-Jugosllavi i ka cilësuar këto vrasje si gjenocid. Po Serbia asnjëherë nuk i ka pranuar si gjenocid këto akte.