Tre britanikë, përfshirë një femër, po përballen me burgun në Shqipëri për rolin e tyre si pjesëtarë të dyshuar të grupit kriminal që ekzekutoi biznesmenin Ardian Nikulaj në Shëngjin.
Dyshimet e autoriteteve janë që Edmond Haxhia, i cili mendohet të jetë porositësi, kontaktoi me Harriet Bridgeman, Steven Hunt dhe Thomas Mithan për ta ndihmuar që të lajë hesapet me Nikulajn, shkruan “Daily Mail”.
Nëse dënohen, britanikët rrezikojnë minimalisht 31 vjet në burg. Magjistratët e Westminster dëgjuan se të afërmit e Haxhisë dhe Nikulajt ishin në një gjakmarrje të dhunshme që datonte vite më parë tek një vrasje në një karburant për para.
E gjithë saga e gjakmarrjes nisi më 25 Qershor 1997, në Lezhë, kur Gëzim Lekstakaj dhe Lorent Gjetja, dyshohet se vranë Pëllumb Nikulajn, vëllain e Ardian Nikulajt. Në Shtator të atij viti, Lekstakaj dhe Gjetja u qëlluan për vdekje në shenjë hakmarrje, sulm për të cilin thuhet se e organizoi Nikulaj.
Daily Mail ka zbardhur edhe deklarimet e përfaqësueses shqiptare në gjyq lidhur me rastin Nikulaj.
“Më 19 Prill në një bar në Shëngjin, Ardian Nikulaj u qëllua 6 herë me armë dhe u vra. Kamerat e sigurisë nga lokali tregojnë si ndodhi ngjarja. Mund të shikoni një person që hyn në lokal me një kokore motori dhe një jelek fluorishent, qëllon gjashtë herë dhe largohet me një motor gri. Ky është qartësisht në sulm i paramenduar dhe që kishte një nivel të rëndësishëm planifikimi dhe specifikisht shënjestrimi të viktimës, i përshkruar si i përfshirë në një gjakmarrje në Shqipëri mes dy familjeve rivale”, tha Zoe Lash, e cila përfaqëson qeverinë shqiptare në gjyq sipas Daily Mail.
“Haxhia dyshohet se është organizatori i vrasjes. Edmond Haxhia është kushëri me një familje që quhet Lekstakaj. Ata janë në gjakmarrje me familjen e viktimës që prej vitit 1997 kur pretendohet se vranë vëllain e viktimës”, është shprehur më tej Lash.