Aplikacionet që përdorin inteligjencën artificiale, si ChatGPT i OpenAI, po marrin hov në botën e mediave, sipas një sondazhi nga Shoqata Botërore e Botuesve (WAN-IFRA), sipas të cilit 49 për qind e të anketuarve thanë se redaksitë e tyre përdorin robot.
“Aplikacioni kryesor është aftësia e mjetit për të shqyrtuar dhe përmbledhur informacionin, për shembull për përmbledhjet apo fjalët kyçe”, sipas hulumtimit, i cili synonte të zbuste frikën se “gazetarët dembelë” tashmë po përdorin inteligjencën artificiale për të prodhuar lajme.
Raporti u publikua në fund të majit, përpara se krerët e OpenAI dhe Google DeepMind, ndër të tjera, të paralajmëronin se inteligjenca artificiale mund të shkaktojë shkatërrimin e njerëzimit.
Parashikimet disi më pak të zymta, si ai që teknologjia e re mund të çojë në zhdukjen e shumë vendeve të punës, janë përsëritur prej vitesh.
Hulumtimi tregon se gazetarët nuk e shohin të ashtuquajturën inteligjencë artificiale gjeneruese si fatale për karrierën e tyre, pavarësisht trazirave dhe pasigurisë në industrinë e medias që nga ngritja e internetit në vitet 1990.
Rreth 70 për qind e të anketuarve presin që inteligjenca artificiale do të jetë “e dobishme për gazetarët dhe redaksitë e tyre”, transmeton agjencia dpa.
E meta kryesore e teknologjisë së re, thanë gazetarët, është shqetësimi për saktësinë dhe plagjiaturën, “minat tokësore” që mund t’i japin fund papritur karrierës së gazetarit.
Një total prej 38 përqind e të anketuarve thanë se shqetësohen për “sigurinë e punës” dhe 82 përqind presin që rolet e tyre “të ndryshojnë pak ose ndjeshëm”.
WAN-IFRA e përshkroi pjesën prej 49 përqind të atyre që përdorin mjete si ChatGPT si “mjaft të jashtëzakonshme”, duke pasur parasysh faktin se ato u bënë gjerësisht të disponueshme vetëm në fund të vitit 2022.
