Austria, Franca, Irlanda dhe Holanda i kanë bërë thirrje Bashkimit Evropian që të forcojë ligjet që synojnë të frenojnë ndikimin klimatik të udhëtimit me avion privat, sipas një dokumenti të përbashkët.
Në vendet e përmendura janë disa nga aeroportet më të ngarkuara në Evropë, transmeton Hina.
Mes tyre janë Schiphol i Amsterdamit dhe “Charles de Gaulle” në Paris.
Schiphol njoftoi në prill se do të ndalonte uljet dhe ngritjet e avionëve privatë dhe të biznesit të vogël, të cilët shkaktojnë 20 herë më shumë emetime të dyoksidit të karbonit sesa fluturimet normale komerciale.
Paralelisht, Franca këtë javë ndaloi fluturimet e shkurtra tregtare të brendshme në rrugët ku ofrohen shërbime të mjaftueshme hekurudhore për pasagjerët.
Në një dokument të ndarë me anëtarët e BE-së përpara një takimi të ministrave të tyre të transportit javën e ardhshme, të katër vendet thanë se besonin se gjurma “e tepruar” e karbonit për frymë e udhëtimit me avion privat duhet të nxisë veprimin e BE-së.
Në vitin 2022, fluturimet me avionë privatë në Evropë u rritën me 64 për qind.
Në të njëjtën kohë, më shumë se 5.3 milion ton dyoksid karboni u lëshuan, sipas hulumtimit të kompanisë konsulente holandeze CE Delft, e cila u porosit nga Greenpeace.
Kjo është vetëm një pjesë e 147 milionë tonëve dioksid karboni që u emetuan në vitin 2019 nga të gjitha fluturimet nga BE dhe Islanda, Lihtenshtajni, Norvegjia dhe Zvicra edhe para se pandemia COVID-19 të ndalonte përkohësisht këtë sektor, sipas informacionit të agjencive të BE-së për sigurinë e trafikut ajror.