Sekretarja e Thesarit e SHBA-së, Janet Yellen ka zgjatur afatin për rritjen e tavanit të borxhit të vendit, duke thënë se qeveria mund të falimentojë më 5 qershor nëse nuk ngrihet tavani i huamarrjes prej 31.4 trilion dollarësh.
Më parë caktoi 1 qershorin si afat, dhe zgjatja tani i jep Shtëpisë së Bardhë dhe negociatorëve nga Kongresi më shumë kohë për të arritur një marrëveshje për rritjen e kufirit ligjor deri në të cilin vendi mund të marrë hua, transmeton Hina.
Përndryshe, Shtetet e Bashkuara mund të gjenden në një situatë ku vonohen ose nuk janë në gjendje të përmbushin detyrimet e veta financiare, qoftë për sa i përket pagave, pensioneve apo pagesave ndaj kreditorëve.
Sipas ekonomistëve, ky skenar i paprecedentë do të ishte sinonim i një recesioni të madh dhe kolapsit të tregut amerikan, me një “ngjitje” të mundshme që do të përhapej në ekonominë globale.