Teksa jashtë Kuvendit të Shqipërisë, qytetarët protestuan në lidhje me rritjen e pagave të deputetëve, kryeministri Rama mbajti fjalën e tij në foltoren e Parlamentit. Ai ju drejtua opozitës duke u thënë se ata nuk duhet që të flasin në emër të shqiptarëve pasi sipas tij, këta të fundit folën shumë qartë më 14 maj.
Rama ka folur edhe në lidhje me rritjen e pagave të qytetarëve dhe rritjen e pagës mesatare e minimale duke u shprehur se këto duhet të kishin ndodhur vite më parë por vendi ynë hasi me probleme si tërmeti, pandemia dhe më pas pasojat e luftës në Ukrainë.
Sipas Ramës opozita u braktis nga shqiptarët, ndërsa përkundrazi mazhoranca është mbështetur gjithmonë nga qytetarët.
‘Kur shqiptarët sapo kanë folur. Nuk është bërë Akoma java e dytë dhe kanë folur aq qartë sa natyrisht kanë tronditur një pjesë të atyre që fatkeqësisht janë atë që nuk duan të dëgjojnë, është shumë komike që të flitet në emër të shqiptarëve. Të flitet në emër të shqiptarëve që braktisën politikën, zgjedhjet apo në emër të të rinjve që ishin të pakët në votime. Pasqyra e pjesëmarrjes flet pak më ndryshe. Shqiptarët nuk kanë braktisur të gjithë ne, por një pjesë nga ne. Sa i takon pjesës që së bashku me të gjithë deputetët në krahun e majtë unë përfaqësoj shqiptarët jo vetëm që nuk na kanë braktisur por na kanë mbështetur më shumë se asnjëherë më parë. Kjo bëhet edhe më e rëndësishme po të kemi parasysh se nuk është një fenomen karakteristik i zgjedhjeve vendore. Braktisësit e të gjitha moshave kërkojini tek mënyra si e lexoni Shqipërinë tek mënyra sesi flisnim për Shqipërinë dhe shqiptarët. Kjo është një këshillë e pa kërkuar që unë ua kam dhënë që në mandatin tonë të parë.’- tha Rama.
