Një ditë pasi u ndalua nga policia e Kavajës, të mërkurën i është komunikuar urdhër arresti Ervis Kurtit, mikut të Habib Rexhës, ku ky i fundit më 21 Maj qëlloi për vdekje Arian Gosën.
Rezulton se është faktuar me prova, përfshirja e Ervis Kurit në ngjarje, mbi të cilin tashmë rëndojnë akuzat e përkrahjes së autorit dhe moskallëzimit të krimit.
Në dëshminë e tij, Ervis Kurti, është shprehur se nuk kishte dijeni për planin e vrasjes nga Habib Rexha të Arian Gosës. Të njëjtin qëndrim ka mbajtur në dëshminë e dhënë edhe vetë Habib Rexha duke thënë se shoku i tij nuk kishte lidhje me ngjarjen.
Ndërkohë policia ka mundur të sekuestrojë autmojetin tip Volkwagen me të cilën u largua Habib Rexha, ndërsa kanë gjetur edhe pistoletën e krimit, të cilën ai e kishte hedhur pranë pistës Iliria në Durrës. Për shkak se pistoleta ka rënë mes disa gurëve nuk është bërë e mundur ende nxjerrja e saj.
Habib Rexha u vetëdorëzua në polici pas negociatave me familjarët e të riut, nga ana e policisë së Kavajës. Gjatë dëshmisë së dhënë në polici, autori i ngjarjes ka mohuar që ditën e ngjarjes të ketë bërë një planifikim për vrasjen e Arian Gosës duke thënë se e kishte parë rastësisht brenda lokalit në Kavajë dhe nga gjaknxehtësia pasi iu kujtua vëllai i tij.
Bëhet me dije se prokuroria e Durrësit bëjnë të ditur se krimi në fjalë është regjistruar me akuzën e gjakmarrjes, çka do të thotë se Habib Rexha në rast dënimi do të vuaj më shumë se 30 vite burg deri në burgim të përjetshëm.