Të martën, Komisioni Evropian ndaloi përkohësisht importin e grurit, misrit dhe lulediellit nga Ukraina në pesë shtete anëtare të BE-së, me kusht që këto produkte të jenë ende në gjendje të kalojnë nëpër ato vende dhe të jenë në qarkullim të lirë në të gjitha vendet e tjera anëtare dhe të shkojnë më tej në eksport.
Komisioni thekson se kjo është një “masë e përkohshme, parandaluese”, e cila është e nevojshme duke pasur parasysh rrethanat e jashtëzakonshme të pengesave serioze logjistike në pesë shtete anëtare – Bullgaria, Hungaria, Polonia, Rumania dhe Sllovakia.
Në të njëjtën kohë, Bullgaria, Hungaria, Polonia dhe Sllovakia janë zotuar të anulojnë masat e njëanshme që ata miratuan për ndalimin e importit të grurit, misrit, farave vajore dhe lulediellit nga Ukraina.
Rumania nuk prezantoi masa të njëanshme.
“Qëllimi është zbutja e pengesave logjistike që lidhen me këto produkte në Bullgari, Hungari, Poloni, Rumani dhe Sllovaki. Masat hyjnë në fuqi më 2 maj dhe do të zgjasin deri më 5 qershor 2023”, thekson Komisioni.
Gjatë kësaj periudhe, këto produkte do të vazhdojnë të jenë në qarkullim të lirë në të gjitha vendet anëtare të Bashkimit Evropian me përjashtim të pesë vendeve anëtare në vijën e frontit.
Këto produkte mund të jenë ende në tranzit nëpër territoret e këtyre pesë shteteve anëtare përmes procedurës së përbashkët të tranzitit doganor.
