Çmimet e naftës u stabilizuan në afro 74 dollarë për fuçi pas raportimeve se Rusia dhe Arabia Saudite po diskutonin masat për të balancuar një treg të tronditur nga frika e një krize bankare, duke zbehur perspektivën për kërkesën.
Në tregun e Londrës çmimi i një fuçie ishte 73.95 dollarë, ndërsa në tregun amerikan një fuçi tregtohej me 67.80 dollarë, raporton Reuters.
Tregjet u tronditën këtë javë nga kolapsi i Bankës së Silicon Valley të SHBA-së dhe të mërkurën vëmendja u tërhoq nga problemet e likuiditetit në Credit Suisse të Zvicrës pas humbjes prej 7.3 miliardë frangash të vitit të kaluar dhe një mesazhi nga aksioneri kryesor i saj se nuk do të merrte pjesë në një rikapitalizim.
Aksionet e bankës zvicerane ranë ndjeshëm, duke nxitur frikën e një krize financiare globale.
“Kriza bankare që filloi në SHBA u përhap në Evropë dhe Credit Suisse, gjë që përforcoi nevojën për të reduktuar ekspozimin në të gjithë tregun”, tha Ole Hansen nga Saxo Bank.
Ndërkohë, Credit Suisse njoftoi se do të marrë hua deri në 50 miliardë franga nga banka qendrore zvicerane për të rritur likuiditetin dhe besimin e investitorëve.
Lajmi mbështeti shkurtimisht çmimet e naftës, të cilat rifilluan një prirje rënëse pasi BQE rriti normat e interesit në eurozonë edhe me gjysmë pikë përqindjeje, pavarësisht mesazheve nga tregu për të pritur që situata të stabilizohej.
Ndjenja e tregut ndryshoi përsëri pasi media shtetërore saudite raportoi se ministri i Energjisë, Princi Abdulaziz bin Salman diskutoi përpjekjet e OPEC + për të ruajtur ekuilibrin e tregut me zëvendëskryeministrin rus Alexander Novak në Riad.
“Lajmet kanë zgjuar lojtarët e tregut që spekulonin mbi rritjen e çmimeve, e cila ishte disi e pritshme duke pasur parasysh shitjet gjatë ditëve të fundit,” tha John Kilduff i Again Capital.
Përfaqësuesit e anëtarëve të Organizatës së Vendeve Eksportuese të Naftës dhe partnerët e tyre i thanë Reuters se grupi beson se çmimet e naftës kanë rënë këto ditë për shkak të frikës së një krize financiare dhe jo për shkak të një çekuilibri midis kërkesës dhe ofertës.
OPEC+ pret që tregu të stabilizohet, shtuan ata.
OPEC ka rritur vlerësimin e kërkesës kineze në vitin 2023 dhe Agjencia Ndërkombëtare e Energjisë (IEA) ka theksuar se pret që kërkesa të rritet për shkak të rivendosjes së trafikut ajror dhe hapjes së ekonomisë kineze pas heqjes së masave të rrepta për të shtypur Covid.
IEA paralajmëroi gjithashtu se rezervat komerciale të naftës në anëtarët e OECD-së arritën nivelin më të lartë në 18 muaj dhe se prodhimi rus në shkurt mbeti afër sasisë së para luftës në Ukrainë, pavarësisht sanksioneve, të cilat do të sinjalizonin një furnizim të bollshëm, transmeton Hina.