Një gjykatë në Londër dha vendimin e parë mbi përgjegjësinë e pjesshme për shpërthimin shkatërrues në portin e Bejrutit në gusht 2020, në të cilin vdiqën rreth 250 njerëz.
Sipas një raporti të mediave të Bejrutit, Gjykata e Lartë e Drejtësisë në Londër e gjeti Savaro, të regjistruar në Britaninë e Madhe, përgjegjës për 250 vdekje të shkaktuara nga shpërthimi i 2 mijë e 750 tonë nitrat amoni, i ruajtur ilegalisht prej vitesh në një hangar në një port libanez.
Sipas aktakuzës, kompania britanike ka luajtur një rol në prokurimin e lëndës shpërthyese para mbërritjes së saj në portin e Bejrutit në vitin 2013.
Kompani dhe individë të shumtë nga shumë vende besohet se janë përgjegjës në nivele të ndryshme për shpërthimin e 4 gushtit 2020.
Oda e Avokatëve të Bejrutit paditi Savaron në Britaninë e Madhe dhe lajmin për vendimin e gjykatës së Londrës e bëri të ditur për mediat, raporton agjencia italiane ANSA.
Në Liban, hetimi gjyqësor është ende de facto i ngrirë, pasi disa politikanë të rangut të lartë dhe anëtarë të aparatit të sigurisë, të përfshirë drejtpërdrejt si bashkëpërgjegjës për krimin, penguan punën e gjyqtarit që drejtonte hetimin libanez me metoda politike dhe gjyqësore.
Një shpërthim i fuqishëm bëri jehonë në Bejrut më 4 gusht 2020, duke vrarë rreth 250 njerëz dhe duke plagosur më shumë se 6 mijë njerëz.