Eurodeputetët duan të hetojnë nëse Katari ka ndikuar në mënyrë të pahijshme në një marrëveshje kyçe të transportit ajror që i jep Qatar Airways akses të pakufizuar në tregun e BE-së.
Kështu shkruan Politico.
Karima Delli, kryetarja e komitetit parlamentar të transportit, e cila negocioi marrëveshjen, paralajmëroi se Katari mund të kishte ndërhyrë në diskutimet e brendshme të marrëveshjes në parlament.
“Duke pasur parasysh ngjarjet e fundit, miratimi i kësaj marrëveshjeje në këtë fazë mund të jetë i vështirë derisa të përcaktohet se kushtet ishin transparente dhe të drejta,” shkroi ajo në një letër drejtuar koordinatorëve të grupit të komisionit të saj.
Delli tha se komiteti do të punojë me hetimet e brendshme të presidentit të Parlamentit Evropian, duke deklasifikuar dokumentet dhe deklaratat “në lidhje me Katarin, nëse është e nevojshme”.
Për sa i përket refuzimit të mundshëm të ratifikimit të marrëveshjes, e cila u përfundua vitin e kaluar, ajo shtoi se komiteti duhet të marrë udhëzime nga Komisioni Evropian “për të na informuar shpejt për procesin aktual të ratifikimit të marrëveshjes së aviacionit midis BE-së dhe Katarit dhe për të na informuar se kur pritet të nisë procedura e miratimit”.
Bisedimet e aviacionit midis BE-së dhe Katarit janë kritikuar ashpër nga linjat ajrore evropiane, të cilat i frikësohen konkurrencës së padrejtë nga fluturimet e Qatar Airways në destinacionet nëpër Azi, si dhe konkurrenti i drejtpërdrejtë i Qatar Airways në Gjirin Persik, lidhjet e të cilit me Evropën mbeten të kufizuara.
Marrëveshja zëvendëson një sërë marrëveshjesh dypalëshe dhe u prezantua si një mënyrë për të garantuar konkurrencë të ndershme dhe standarde uniforme sociale dhe të punës. Megjithatë, një pjesë e sektorit evropian të aviacionit e dënoi marrëveshjen.
Kujtojmë se në Bruksel dhe rrethinat e tij më 9 dhjetor u kryen kontrolle dhe arrestime në kuadër të një hetimi për veprimtarinë e një “organizate kriminale, korrupsion dhe pastrim parash”.
