Mjeku Ilir Alimehmeti ditën e sotme ka prezantuar kandidaturën për primarët në Tiranë për të marrë pjesë në zgjedhjet vendore të 2023.
‘Vij sot këtu para jush për t’iu dedikuar Tiranës dhe komunitetit. Tirana jonë është e sëmurë, i ka të gjitha mundësitë të shërohet’, tha ai.
Në fjalimin e tij, Alimehmeti nuk la pa bërë një thirrje edhe për qytetarët që të marrin pjesë në protestën që Partia Demokratike dhe aleatët e saj do të organizojnë më datë 12 nëntor. Thirrja e tij ishte edhe për përkrahje dhe votime në primaret e PD-së.
“Thirrje të fortë për pjesëmarrje masive në protestën e 12 nëntorit për të filluar çrrënjosjen e së keqes që ka pllakosur çdo prag. Ju ftoj të merrni pjesë masivisht në protestë dhe të votoni në primare. Ju ftoj ta shërojmë bashkërisht Tiranën. Tirana është e jona”, tha ai.
Ilir Alimehmeti do të jetë në këtë garë për Tiranën përballë deputetit Belind Këlliçi dhe ish-deputetit Gerti Bogdani.