Kryetari i Partisë Demokratike, Sali Berisha i është përgjigjur deklaratave të të dërguarit amerikan për Ballkanin Perëndimor Gabriel Escobar bërë gjatë intervistës në ‘Zërin e Amerikës’ sa i përket vendimit për shpalljen non grata.
Berisha shprehet se “z. Gabriel Escobar përsëriti shpifjet ndaj meje përmes Zërit të Amerikës, por si gjithmonë, duke mos përcjellë dot qoftë edhe një fakt të vetëm”.
Sipas tij, shpallja non grata 8 vite pasi kisha hequr dorë nga çdo rol udhëheqës dhe vendimmarrës në Partinë Demokratike kishte dhe ka si qëllim kryesor të ndihmohej qeveria e Edi Ramës dhe të dëmtohej opozita shqiptare e të përbaltej trashëgimia e saj 30 vjeçare.
Berisha përsërit deklaratën e tij se në momentin kur sekretari i shtetit ose çdo agjenci tjetër e SHBA apo e çdo vendi tjetër mbi tokë, do të paraqesë një provë, dokument të vërtetë të vetëm që fakton akuzën e z. Blinken për korrupsion ndaj tij, ai do të merrte çdo vendim kundër vetes së tij, përfshi këtu largimin përfundimtar nga jeta politike.