Pas afro tri vitesh, Prokuroria e Posaçme finalizoi hetimet dhe pritet të dorëzojë në gjykatë dosjen penale me shkeljet e konstatuara në tenderin e rrugës Kardhiq-Delvinë.
Elona Gogo, ish-kryetare e komisionit të vlerësimit të ofertave është marrë e pandehur për akuzën e shkeljes së barazisë në tendera. Nga verifikimi i regjistrit të gjendjes Civile, rezulton se Elona Gogo është motra e drejtoreshës së IKMT-së, Dallëndyshe Bici.
Nga hetimet e SPAK që nisën pas kallëzimit të kompanisë Gjoka, rezultoi se në kundërshtim me ligjin, Gogo e ka skualifikuar këtë kompani nga tenderi duke favorizuar në këtë mënyrë atë fituese. Për të njëjtin tender, pritet t’i komunikohet akuzë edhe ish- drejtoreshës së autoritetit Rrugor Shqiptar, Sonila Qato.
Ish-zyrtarja ishte ftuar nga SPAK për t’u njohur me rezultatet e hetimit me datë 20 tetor, por nuk u paraqit, për arsye shëndetësore. Burimet thanë se ish-zyrtares pritet t’i dërgohet një fletëthirrje e re nga ana e prokurorisë.
Ndërkohë që Gogo është paraqitur në institucionin e akuzës dy ditë më parë e shoqëruar nga avokati i saj Sokol Hazizaj. Pasi janë njohur me aktet, pritet që brenda 10 ditësh ata të paraqesin argumentet e tyre e më pas dosja t’i dorëzohet gjykatës.
