Gazetari Bledi Mane ka publikuar historinë e një djaloshi i cili endet rrugëve prej gati 15 vitesh i braktisur e kërkon apel për ndihmë. Ai nuk është shqiptar, por boshnjak ose malazez që e thërrasin me emrin Sasha.
Bledi Mane tregon se janë njohur në ambientet e burgut 313 në Tiranë, e teksa që nga ajo kohë, i palarë, i paushqyer, i harruar Sasha jeton rrugëve.
Gazetari bën thirrje që gjithkush të kontribuojë e ndërsa i bën thirrje dhe Bashkisë, Policisë e Ministrisë së Jashtme që të vendosin kontakte me familjen në vendin e tij.
POSTIMI I PLOTË I BLEDI MANES:
“E kam njohur për herë të parë kur më kishin rrasur herën e dytë në burg. Ishim në sektorin 4 te kati i tretë në burgun 313 në Tiranë. Mbaj mend që ka qenë vera e vitit 2002. Ky person që shihini në foto ishte normal si gjithë të tjerët por dhuna shtazarake dhe poshtërimet që të burgosurit ushtronin ndaj tij, e tjetërsuan. Nuk është shqiptar por mund të jetë ose boshnjak ose malazez. Kur e rastis rrugëve të Tiranës i thërras me emrin Sasha. Ka rreth 15 vjet i braktisur e katandisur rrugëve dhe kazanëve të plehrave të Tiranës. 15 vjet i palarë, i paushqyer, i harruar. Ftoj Drejtorinë e Përgjithshme të Burgjeve të bëjë verifikimin zyrtar të dosjes së këtij njeriu të braktisur e me pas Bashkinë, Policinë dhe Ministrinë e Jashtme të vendosin kontakte me familjen në vendin e tij. Le ta ndihmojmë të gjithë të rikthehet ne vendin e tij, në familjen e tij të cilët do të shokohen e lumturohen kur ta shohin që fatkeqi është i gjallë”, shkruan Mane.