Ministrja e Arsimit, Ogerta Manastirliu ka komunikuar reformat e ndërmarra në kopshte. Manastirliu deklaroi se në krye të prioriteteve do të jetë reforma e arsimit parashkollor.
Bazuar në reformat e fundit, ministrja tha se parashikohen gjoba nga 500 mijë deri në 1 mln lekë për kopshtet e çerdhet pa licencë.
“Në rast të mosplotësimit të dokumentacionit dhe pajisjes me licensën përkatëse do të vijohet me masat që parashikon ligji, Gjobë në 500 mijë deri në 1 mln leke të reja dhe ndërprerje e menjëhershme e veprimtarisë. Paralelisht praktikat do t’u referohen organeve kompetente bazuar në legjislacionin në fuqi”, u shpreh Manastirliu.
Manastirliu shtoi se Task Forca do të vijojë kontrollet në institucionet e arsimit parashkollor.
“Nga kontrollet e këtyre ditëve janë inspektuar 90 kopshte jopublike dhe 67 prej tyre ushtrojnë veprimtari në përputhje me ligjin. 8 kopshte rezultojnë të mos kenë aplikuar për licensimin përkatës dhe dy prej tyre i është refuzuar licensimi”, tha Manastirliu.