Plas tek Izraeli. Kombëtarja që Shqipëria do të përballet ditën e shtunë nuk po gjen rehat. Pas prapaskenave që u bënë publike nga trajneri në lidhje me lënien jashtë të Zahavit, një tjetër skandal ka prekur këtë kombëtare gjatë këtyre ditëve. Izraeli ka vendosur të rikthejë yllin e kampionatit vendës, Omar Atzili, për ndeshjet në Ligën e Kombeve.
Emri i këtij futbollisti është shumë i përfolur në Izrael, pasi në vitin 2020 ai u përjashtua nga kombëtarja sepse dyshohej se ishte i përfshirë në një skandal seksual me disa të mitura.
Lojtari që tashmë luan për Makabi Haifën, ishte nën hetim, pasi bashkë me futbollistin Dor Miça, kanë kryer marrëdhënie seksuale me dy 15-vjeçare. Asokohe u falën nga prokuroria, sepse sipas tyre u vërtetua se nuk kishin dijeni që vajzat ishin minorene.
Por në disa mesazhe që ka zbuluar dhe publikuar pak kohë më parë “Haaretz”, del që të dy lojtarët e dinin që ato ishin minorene.
Atzili vlerësohet si lojtari më i mirë në kampionatin izraelit, por nga ana tjetër presidenti i Federatës Izraelite, Oren Hason, është shprehur se nuk shikon ndonjë arsye përse të lërë jashtë kombëtares një lojtar si Atzili.
“Kontrollova në prokurori dhe nuk kishte asgjë kundër tij. Ai është lojtari më i mirë në ligën izraelite. Çfarë shpjegimi profesional ka për mosthirrjen e tij”, thotë Hason.
