Jeta të përballë me shumë sfida, madje për disa njerëz rrugëtimi i jetës është më i vështirë se i disa të tjerëve. Bëhet fjalë për historinë e vërtetë të Yusrës dhe Sarës, biografia e dy motrave siriane që braktisën vendin pas luftës. Me anë të një seriali në Netflix tregohet me detaje realiteti i hidhur me të cilin u përballën dy notaret e talentuara.
Që të dyja me ëndrra të mëdha, vajzat lanë pas prindërit dhe në 2015, u nisën nga Turqia me varkë drejt ishullit Lesbos në Greqi.
Por jo gjithçka shkoi siç duhej, ndaj motrat u detyruan që për të shpëtuar 18 jetë, të hidheshin në det të hapur dhe rrugën ta bënin me not.
Ato mundën të emigronin drejt Gjermanisë, ku mes qindra vështirësive, Yusra arriti që të merrte pjesë në Lojërat Olimpike të 2016, në Rio duke realizuar dëshirën e saj më të madhe.
“Kur lashë vendin tim dhe vendosa të shkoja në lojërat Olimpike, nuk e besoja se do të ndodhte vërtet. Unë ende nuk arrij ta besoj”, tregon ajo pas publikimit të biografisë.
Po ku janë sot motrat që frymëzuan mijëra njerëz?
Sarah, motra e madhe, u rikthye sërish në Lesbos, për të ndihmuar emigrantë të tjerë. Për këtë shkak ajo u dënua me tre muaj burg për ndihmën e emigrantëve të paligjshëm, ndërsa rrezikon të dënohet me 25 vjet.
“Nëse të ndihmosh të tjerët është krim, atëherë ne jemi të gjithë kriminelë”, është shprehur Sahar për The Guardian.
Yusra nga ana tjetër, ndjek kolegjin në Berlin ndërsa u kualifikua në ekipin sirian për Lojërat Olimpike të Tokios në 2020, por zgjodhi të notonte në ekipin e refugjatëve.
Njësoj si edhe motra e saj, notarja olimpike është aktiviste për të drejtat e refugjatëve ndërsa shumë shpejt do të hapë edhe një organizatë bamirësie.
