Vdekja tragjike e Princeshës Diana pothuajse 25 vjet më parë tronditi botën. Princesha ishte vetëm 36 vjeçe kur vdiq pas një aksidenti automobilistik në Paris më 31 gusht 1997, ku vdiq edhe shoku i saj Dodi Fayed dhe shoferi i mjetit.
Makina ishte përplasur në tunelin Pont de l’Alma në kryeqytetin francez dhe si pasojë e përplasjes, shërbimi i urgjencës shkoi në vendngjarje. Njëri prej tyre ishte zjarrfikësi Xavier Gourmelon, i cili kur pa Dianën për herë të parë, nuk e kishte idenë se kush ishte ajo.
Ai nuk e besonte se “bjondja” në pjesën e pasme të makinës ishte plagosur rëndë pasi kishte sytë hapur dhe ishte në vetëdije. Para se ta nxirrnin nga makina, ai e kapi për dore dhe e ngushëlloi duke i thënë të qëndronte e qetë.
Më pas Diana e pyeti:
“Zoti im, çfarë ka ndodhur?” Vetëm pak çaste më vonë ajo pësoi një atak kardiak. Gourmelon i tha më parë ‘The Sun’: “Ia masazhova zemrën dhe disa sekonda më vonë ajo filloi të merrte përsëri frymë. Sigurisht që ishte një lehtësim sepse, si reaguesi i parë, ju doni të shpëtoni jetë – dhe kjo është ajo që mendova se kisha bërë. Të jem i sinqertë mendoja se do të jetonte. Me sa e dija kur ishte në ambulancë, ajo ishte gjallë dhe prisja që ajo të jetonte. Por më vonë mora vesh se ajo kishte vdekur në spital. Ishte shumë shqetësuese. Tani e di që kishte lëndime të rënda të brendshme, por i gjithë episodi është ende në mendjen time. Dhe kujtimi i asaj nate do të mbetet me mua përgjithmonë. Nuk e kisha idenë atëherë se ishte Princeshë Diana. Vetëm kur ajo ishte futur në ambulancë, një nga mjekët ndihmës më tha se ishte ajo.”
Pavarësisht përpjekjeve më të mira të mjekëve, Diana ndërroi jetë në orën 4 të mëngjesit me orën lokale, në spitalin Pitie-Salpetriere në Paris.
